ဖုံးကွယ်ထားသော ယန္တရားကို ဖော်ထုတ်ခြင်း – ပြည်တွင်းရဲတပ်ဖွဲ့နှင့် ICE တို့၏ ပူးပေါင်းဆောင်ရွက်မှု
kaiMyanmar Gazette
နိုင်ငံတစ်ဝှမ်းရှိ မြို့နယ်အသီးသီးတွင် ပြည်တွင်းရဲဌာနများနှင့် Sheriff ရုံးများသည် Federal လူဝင်မှုကြီးကြပ်ရေး အရေးယူဆောင်ရွက်မှုများတွင် ပိုမိုတက်ကြွစွာ ပါဝင်လာကြသည်။ သို့သော်လည်း ထိုပူးပေါင်းဆောင်ရွက်မှုများကို ခြေရာခံရန်မှာ လျှို့ဝှက်ချက်များဖြင့် ဖုံးကွယ်ခြင်း ခံထားရသည်။ မှတ်တမ်းမှတ်ရာများမှာ မကြာခဏဆိုသလို ကြန့်ကြာခြင်း၊ ထိန်ချန်ခံရခြင်း သို့မဟုတ် ပြည့်စုံမှုမရှိခြင်းတို့ကြောင့် Immigration and Customs Enforcement (ICE) သည် ဒေသတွင်း၌ မည်သို့လည်ပတ်နေသည်ဆိုသည့်အချက်တွင် လူထု၏ တာဝန်ခံမှု၊ တာဝန်ယူမှုဆိုင်ရာ သိသာထင်ရှားသော ကွက်လပ်တစ်ခု ဖြစ်ပေါ်နေစေသည်။
ဥပဒေပညာရှင်များ၊ သုတေသီများနှင့် ပွင့်လင်းမြင်သာမှုရှိစေရန် ဆောင်ရွက်နေသူများပါဝင်သော ဆွေးနွေးပွဲကို ဧပြီ ၂၄၊ ၂၀၂၆ က American Community Media က ဦးဆောင်ကာ ပြုလုပ်ခဲ့ပြီး လူဝင်မှုကြီးကြပ်ရေး အရေးယူဆောင်ရွက်မှု၏ ပြောင်းလဲလာသော အခြေအနေများကို ဆွေးနွေးခဲ့ကြကာ ထိုဖုံးကွယ်ထားသော ဆက်နွှယ်မှုများကို မှတ်တမ်းတင်နိုင်ရန် အရင်းအမြစ်များကို မျှဝေပေးခဲ့သည်။
California ပြည်နယ်အတွင်း ပွင့်လင်းမြင်သာမှုအတွက် တိုက်ပွဲဝင်ခြင်း
Ventura County တွင် မကြာသေးခင်က ဖြစ်ပွားခဲ့သော ဥပဒေကြောင်းအရ အနိုင်ရခဲ့သောဖြစ်ရပ်တစ်ခုကို အလေးပေးပြောကြားခဲ့သည်။ First Amendment Coalition (FAC) သည် Glass House Farms ရှိ အကြီးစား ဝင်ရောက်စီးနင်းမှု ဗီဒီယိုမှတ်တမ်းများကို ထုတ်ပေးရန် ငြင်းဆန်ခဲ့သည့် Sheriff ကို တရားစွဲဆို၍ အောင်မြင်စွာ ရယူနိုင်ခဲ့သည်။ Sheriff ဘက်မှ ၎င်းတို့၏ လက်ထောက်များသည် “လူစုလူဝေးကို ထိန်းချုပ်ရန်” သာ ရှိနေခဲ့ခြင်းဖြစ်သည်ဟု ဆိုသော်လည်း ထိုဌာနသည် မှတ်တမ်းများ ထုတ်ပေးရန် ကနဦးတွင် ငြင်းဆန်ခဲ့သည်။
David Loy (Legal Director of the First Amendment Coalition) က ဥပဒေစိုးမိုးရေး အေဂျင်စီအများစုသည် မှတ်တမ်းတောင်းဆိုမှုများကို အလိုအလျောက် ငြင်းဆန်ရန်သာ အမြဲတမ်း ပြင်ဆင်ထားလေ့ရှိကြောင်း အလေးပေး ပြောကြားခဲ့သည်။
“ပွင့်လင်းမြင်သာမှုဆိုသည်မှာ တာဝန်ခံမှုအတွက် အသက်ရှူရန် လိုအပ်သောအောက်ဆီဂျင်ဖြစ်ပြီး ဥပဒေစိုးမိုးရေးတွင် ထိုအချက်က ပို၍ပင် အရေးကြီးပါသည်။ အစိုးရသည် ပြည်သူ့အတွက် အလုပ်လုပ်ပေးခြင်းဖြစ်ပြီး ပြည်သူသည် အစိုးရအတွက် အလုပ်လုပ်ပေးနေခြင်း မဟုတ်ပါ။” ဟု Loy က ဆိုသည်။
လုပ်ငန်းခွင်သုံး ကိရိယာများ
ကွင်းဆင်းသတင်းထောက်များအတွက် ထိုအတားအဆီးများကို ကျော်လွှားရန် မဟာဗျူဟာကျသော ချဉ်းကပ်မှု လိုအပ်သည်။ FAC မှ Thadeus Greenson က သတင်းထောက်များအနေဖြင့် ဖက်ဒရယ် FOIA ၏ ကြန့်ကြာမှုများကို ကျော်လွှားနိုင်ရန် California Public Records Act ကဲ့သို့သော ပြည်နယ်ဥပဒေများကို အသုံးပြုရန် ကူညီပေးမည့် “Reporters Field Guides” စာအုပ်စီးရီးအသစ်ကို မိတ်ဆက်ပေးခဲ့သည်။
ဒေသတွင်းရှိ 911 ဖုန်းခေါ်ဆိုမှုမှတ်တမ်းများ
ပုဂ္ဂလိကထိန်းသိမ်းရေးစခန်းများနှင့် ချုပ်ဆိုထားသော စာချုပ်များ၊ နှင့် လိုင်စင်နံပါတ်ပြားဖတ်စက် (License plate reader) အချက်အလက်များသည် ဖက်ဒရယ်အချက်အလက်များထက် အရေးယူဆောင်ရွက်မှု အခြေအနေကို ပိုမိုရှင်းလင်းစွာ မြင်သာစေကြောင်း Thadeus Greenson က ဆွေးနွေးခဲ့သည်။
“ဒီကိစ္စရပ်အပေါ် ဒေသတွင်း သတင်းတင်ပြချက်တစ်ခုစီတိုင်းဟာ ပွင့်လင်းမြင်သာမှုရှိလာစေဖို့ တစ်စစီ ပြန်လည်ဆက်စပ်ပေးနေတဲ့ အစိတ်အပိုင်းလေးတွေ ဖြစ်ပါတယ်။” ဟု Greenson က ပြောကြားခဲ့သည်။
“FOIA Wall” အတားအဆီးကို ကျော်ဖြတ်ခြင်း
MuckRock မှ Training Director ဖြစ်သူ Elizabeth Clemons က “FOIA 101” အခြေခံများကို ရှင်းလင်းပြောကြားခဲ့ပြီး လက်ရှိအစိုးရလက်ထက်တွင် ဝန်ထမ်းအင်အား လျှော့ချမှုများနှင့် ဦးစားပေးကိစ္စရပ်များ ပြောင်းလဲမှုတို့ကြောင့် တုံ့ပြန်မှုရရှိရန် သိသာထင်ရှားစွာ ကြန့်ကြာနေကြောင်း ထောက်ပြခဲ့သည်။ ရရှိလာသော မှတ်တမ်းများကို ခွဲခြမ်းစိတ်ဖြာရန် DocumentCloud ကဲ့သို့သော ပလက်ဖောင်းများကို အသုံးပြုရန်နှင့် ဇွဲမလျှော့ဘဲ ဆက်လက်လုပ်ဆောင်ရန် တိုက်တွန်းခဲ့သည်။
“ကောင်းသော ရည်ရွယ်ချက်ရှိသည်ဟု မှတ်ယူပါ၊ စိတ်ရှည်ပါ၊ နောက်ဆက်တွဲ ထပ်မံစုံစမ်းပါ၊ ယဉ်ကျေးပျူငှာစွာ ဆက်ဆံပါ။ တစ်ဖက်မှာလည်း လူသားတစ်ယောက်ရှိနေတယ်ဆိုတာကို သတိရပါ။” ဟု Clemons က ပြောကြားခဲ့သည်။
အရေးယူဆောင်ရွက်မှု၏ ပထဝီဝင်အနေအထား
အများ၏အာရုံစိုက်မှုမှာ Los Angeles သို့မဟုတ် Chicago ကဲ့သို့ မြို့ကြီးများရှိ လူသိများသော ဝင်ရောက်စီးနင်းမှုများအပေါ်တွင်သာ ရှိနေသော်လည်း၊ Syracuse University မှ သုတေသနပါမောက္ခ Austin Kocher က အရေးယူဆောင်ရွက်မှု၏ စစ်မှန်သော “စနစ်တကျ လုပ်ဆောင်မှုများ” မှာ တောင်ပိုင်းဒေသများ၊ အထူးသဖြင့် Texas နှင့် Florida တို့ရှိ ဒေသတွင်း ယန္တရားများမှတစ်ဆင့် တိတ်တဆိတ် လုပ်ဆောင်နေခြင်းဖြစ်သည်ဟု ဆိုသည်။
ပူးပေါင်းဆောင်ရွက်မှုဆိုသည်မှာ အသစ်အဆန်းမဟုတ်ဘဲ ၁၈၀၀ ပြည့်နှစ်များကတည်းက ရှိခဲ့ခြင်းဖြစ်ကြောင်း Prof. Kocher က ပြောကြားခဲ့သည်။
“လူဝင်မှုကြီးကြပ်ရေး အရေးယူဆောင်ရွက်မှုဆိုတာ ဒေသဆိုင်ရာ ယန္တရားတစ်ခု ဖြစ်ပါတယ်။ စနစ်အတွင်း လူတွေ ဘယ်လိုဖြတ်သန်းသွားရတယ်ဆိုတာကို နားလည်ဖို့ဆိုရင် သူတို့ ဘယ်နေရာမှာ အဖမ်းခံရသလဲ၊ ဥပဒေဆိုင်ရာ အကြံပေး ရနိုင်သလား၊ လူဝင်မှုကြီးကြပ်ရေး တရားသူကြီးက ဘယ်သူလဲ ဆိုတဲ့အချက်တွေအပေါ် မူတည်ပါတယ်။”
လက်တွေ့ဆောင်ရွက်ရန် တိုက်တွန်းချက်
လူဝင်မှုကြီးကြပ်ရေး အရေးယူဆောင်ရွက်မှုများသည် ဗဟိုမှမဟုတ်ဘဲ ဒေသအလိုက် ပိုမိုပျံ့နှံ့လာသည်နှင့်အမျှ ဒေသတွင်း သတင်းတင်ပြမှုများသည်သာ တာဝန်ခံမှုရှိစေရန် တစ်ခုတည်းသော နည်းလမ်းဖြစ်ကြောင်း ပါဝင်ဆွေးနွေးသူများက ပြောကြားခဲ့သည်။
အောက်ပါအရင်းအမြစ်များကို အသုံးပြုရန်လည်း တိုက်တွန်းထားပါသည် –
- Legal Hotline (California ပြည်နယ်ဆိုင်ရာမှတ်တမ်းပြဿနာများအတွက်)
- MuckRock
- DetentionReports.com
အေဂျင်စီများအကြား ပူးပေါင်းဆောင်ရွက်မှုကို ဖော်ထုတ်ခြင်းနှင့် ပြည့်စုံမှုမရှိသော အချက်အလက်များကို ခွဲခြမ်းစိတ်ဖြာခြင်းဖြင့် ရွှေ့ပြောင်းမိသားစုများနှင့် လူ့အဖွဲ့အစည်းအပေါ် သက်ရောက်နေသည့် ကြီးမားသော ရိုက်ခတ်မှုများကို ဆက်လက်မှတ်တမ်းတင်နိုင်မည်ဖြစ်ကြောင်းကို နိဂုံးချုပ်ဆွေးနွေးခဲ့သည်။
