အရွဲ့တိုက်

“အရွဲ့တိုက်”

ခင်ဗျားတို့ရဲ့မျက်လုံးတွေဟာ

ကျွန်တော့်ဆီက ယူတပ်ထားတာမဟုတ်ဘူးဆိုတော့

ကျွန်တော်မြင်နေရတာဘာလဲဆိုတာကို

ခင်ဗျားတို့သိကြမှာမဟုတ်ဘူး

ကျွန်တော့်ရှေ့တည့်တည့်မှာ မြူခိုးတံတိုင်း

အဲဒီထက် ခင်ဗျားတို့ပိုရိုင်းတယ်

ကျွန်တော်က တစ်နေ့ရွှေတစ်နေ့ငွေဆိုရင်

ကျွန်တော့်ကို ရွှေမရှားငွေမရှားလို့သတ်မှတ်ပါ

ခင်ဗျားတို့ဝတ်ဆင်ထားတဲ့ ဝတ်လစ်စလစ်စကားများ

အထပ်ထပ်ချွတ်ချလိုက်

ရှေ့ဆောင်နွားလားဖြောင့်ဖြောင့်မသွားရင်

နောက်လူတစ်သိုက် စိုက်စိုက်ရိုက်မယ်

ဝါးအစည်းကိုဖြေချလိုက်တဲ့ခင်ဗျားတို့ပါးစပ်နဲ့

ကျွန်တော့်ကို စည်းလုံးညီညာအောင်ကြောင်းဖြာလို့မပြောပါနဲ့

တိတ်တိတ်လေးနေမယ်

ကျွန်တော်ရှက်တတ်တယ်

ပတ်ပတ်လည်မှာ ခင်ဗျားတို့ကိုယ်ခင်ဗျားတို့ပြန်ချိန်ထားတဲ့သေနတ်တွေ . . . . . . ။

သူရဿဝါ

မေ ၁၁ ရက် ၊ ၂၀၁ဝ ခုနှစ်