ဓမ္မလေ့လာရေး ခရီးစဉ် ပထမနေ့ (၂) သန်လျင် သဘာဝတရားရိ်ပ်သာ

သန်လျင်ဖားအောက်တောရရိပ်သာမှာ သံဃာတော်များနှင့် ယောဂီများ နေ့ဆွမ်းအလှူခံတဲ့အချိန်က ၁ဝ နာရီ ခွဲဖြစ်ပါတယ်။ ကျွန်မတို့ရောက်သွားချိန်က ကွက်တိဖြစ်သွားပါတယ်။ စကြံင်္လမ်းတစ်လျှောက် သံဃာတော်များ တန်းဆွမ်းကြွလာကြပြီး ဆွမ်းစားဆောင်ထဲ ဝင်ခါနီး အပေါက်ဝမှာ ဆွမ်း၊ ဆွမ်းဟင်းနဲ့ အချိုပွဲများကို အလှူရှင်များမှ စောင့်ပြီးလောင်းလှူကြပါတယ်။ လှူတဲ့ဆွမ်းကို ကိုယ်တိုင်လက်နဲ့လောင်းလှူရတဲ့ ပီတိကို ခံစားရပါတယ်။ ကျွန်မတို့အဖွဲ့ကလဲ သံဃာတော်များကို လှူဒါန်းရန် မင်းကွတ်သီးများ ဝယ်ယူသွားခဲ့တဲ့အတွက် ကိုယ်တိုင်ကိုယ်ကျ သပိတ်ထဲကို လောင်းလှူခဲ့ကြရတဲ့ ကြုံတောင့်ကြုံခဲ ဒါနလေးတစ်ခု ပြုခဲ့ရပါတယ်။ သတ်သတ်လွတ်ရိပ်သာအတွက် ဆန်ကြာဇံလဲ လှူဖြစ်ခဲ့ပါတယ်။ ရဟန်းသံဃာများအတွက် ဆွမ်းစားဆောင်သီးသန့်တစ်ဆောင်နဲ့ သီလရှင်နဲ့ လူဝတ်ယောဂီ အမျိုးသား အမျိုးသမီးများအတွက် သီးသန့် တစ်ဆောင်ဖြစ်ပါတယ်။ ယောဂီများ၏ ဆွမ်းမစားမီ ဆွမ်းဒါနအတွက် စုပေါင်းမေတ္တာပို့ခြင်းနှင့် ဆွမ်းကိုဆင်ခြင်သုံးဆောင်ရန် သတိပေးဂါထာရွတ်ဖတ်မှုကို ကြားရတာကလဲ ကြည်နူးပီတိဖြစ်ခဲ့ရပြန်ပါတယ်။

ကျွန်မတို့ ဧည့်သည်တွေကိုလဲ ယောဂီများနဲ့အတူတူ နေ့လည်စာကျွေးမွေးဧည့်ခံပါတယ်။ သတ်သတ်လွတ် ဟင်းလျာများဖြစ်တဲ့ အာလူးနှပ် (မဆာလာနံ့အနဲငယ်ပါတယ်)၊ ပဲနဲ့ ရွှေဖရုံသီးဟင်းချို၊ သရက်ချဉ်သုတ်၊ သီးရွက်စုံကြော်နဲ့ သတ်သတ်လွတ် ငါးပိချက်တစ်ခွက်ပါပါတယ်။ အာဟာရဓါတ်အားလုံးပြည့်စုံပြီး လက်ရာအလွန်ကောင်းပါတယ်။ အဲဒီလိုသာ အမြဲတမ်းစားရရင် နေ့တိုင်းတောင် သတ်သတ်လွတ်စားနိုင်တယ်လို့တောင် စိတ်ထဲမှာအတွေးဖြစ်ပေါ်သွားခဲ့ပါတယ်။ ဆွမ်းစားပြီးနောက် ဖားအောက်ဆရာတော်ဘုရားကြီး ရေးသားထုတ်ဝေခဲ့တဲ့ အပြင်မှာလဲ ဝယ်ရခက်ခဲတဲ့ စာအုပ်တွေကို ဝယ်ခဲ့ကြသေးတယ်။ ရိပ်သာအတွင်း လှည့်ပတ်ကြည့်ရှုရင်း လူအရိုးစု အစစ် တစ်ခုကို သံဝေဂရအောင် သွားကြည့်ခဲ့ပေမယ့် အမှန်ပြောရရင်တော့ ဘာသံဝေဂမှ မရခဲ့ပဲ ဒီအတိုင်းပဲ ကြည့်ခဲ့လိုက်မိတယ်။

ပြီးတော့မှ ရုံးခန်းကိုသွားပြီး ငွေကြေးအလှူဒါနတွေ တတ်နိုင်သလောက်ပြုခဲ့ကြပါသေးတယ်။ ပြန်ထွက်လာတော့ ဖားအောက်ဝင်းထဲက ကောဏာဂမနုစေတီတော်ကို သွားရောက်ဖူးမျှော်ခဲ့ကြတယ်။ အဲဒီစေတီဘေးကနေ ဆက်ဝင်သွားရင် ကျိုက်ဒေးဝဘုရားရှိပါတယ်။ အဲဒီဘုရားမှာ ရှုခင်းကောင်းလို့ ရုပ်ရှင်အဖွဲ့တွေ အမြဲတမ်းရိုက်ကူးနေကျနေရာတစ်ခုဖြစ်ပါတယ်။ ကျွန်မတို့အဖွဲ့ရဲ့ မှတ်တမ်းတင် ဓါတ်ပုံဆရာကတော့ ဓါတ်ပုံတွေ မှတ်တမ်းတင်ခဲ့ပါတယ်။ မိုးများတဲ့အချိန်ဖြစ်နေတော့ ရှုခင်းက ထင်သလောက်မကောင်းဖြစ်နေတာကိုတော့ ခေါ်သွားတဲ့ကျွန်မအနေနဲ့ စိတ်မကောင်းဖြစ်ရပါတယ်။ နွေရာသီကျမှပဲ တစ်ခါထပ်သွားပြီး ဓါတ်ပုံလှလှတွေ သွားရိုက်အုန်းမယ်လို့ စိတ်ထဲမှာ မှတ်ထားလိုက်ပါတယ်။

ကျိုက်ဒေးဝဘုရားကနေထွက်လာခဲ့ပြီး သဘာဝတရားရိပ်သာကို ဦးတည်ခဲ့ပါတယ်။ ကျိုက်ခေါက်ဘုရားကိုတော့ အောက်ကနေပဲ ဖူးမျှော်ခဲ့ပြီး ကပ်ကျော်သွားခဲ့ပါတယ်။ သဘာဝတရားရိပ်သာက အရှေ့ပိုင်းတက္ကသိုလ်သွားတဲ့လမ်းပေါ်ကနေ အတွင်းကို ဝင်သွားရပါတယ်။ တက္ကသိုလ်မရောက်ခင် နှစ်မှတ်တိုင်စာလောက်အလိုမှာ လမ်းခွဲတစ်ခုရှိပြီး အဲဒီကနေ အတွင်းကို နဲနဲတော့ဝေးတယ်။ ကားနဲ့သွားမှသာ အဆင်ပြေမယ့်နေရာတစ်ခုပါပဲ။ အထဲကိုရောက်တော့ ကျွန်မတို့ကို ဦးဆောင်ခေါ်လာတဲ့ ဆရာဝန်က ရုံးခန်းလို့ ယူဆရတဲ့အဆောက်အဦးတစ်ခုထဲကို ခေါ်သွားပါတယ်။ ဝေယျာဝစ္စပြုလုပ်တဲ့အဖွဲ့ရဲ့ လှိုက်လှဲဖော်ရွေပုံက ဧည့်သည်တွေကိုတောင် အနေခက်သွားစေပါတယ်။ အထဲကို ဝင်ဖို့ခေါ်ပြီး ထိုင်ခိုင်းပြီး ကော်ဖီနဲ့မုန့်နဲ့ ဧည့်ခံပါတယ်။ သိချင်တာတွေကို အမျိုးသမီးယောဂီတစ်ဦးက ရှင်းပြပေးပါတယ်။

မိုးတွေသဲနေတဲ့အချိန်ဆိုတော့ ကော်ဖီပူပူသောက်ရင်း နားထောင်ကြပါတယ်။ ဆရာတော့်ကိုတော့ ဓါတ်ပုံပဲ ဖူးခဲ့ရပါတယ်။ တရားပွဲတစ်ခုအတွက် ရန်ကုန်ကိုသွားနေတယ်လို့သိခဲ့ရပါတယ်။ လောလောဆယ်အခြေအနေမှာ ယောဂီနဲ့ လုပ်အားပေးနေတဲ့လူတွေ စုစုပေါင်း ၆၀ဝ ကျော်ရှိပါတယ်။ ဆရာတော်က အယုတ် အလတ် အမြတ် မရွေး၊ အသက်အရွယ်မရွေး၊ ဘာသာမရွေး အားလုံးကို လက်ခံပြီး တရားပြသပေးတယ်လို့ သိရပါတယ်။ သစ္စာလေးပါး တရားဆိုတာ လူသားအားလုံးအတွက်ဖြစ်တယ်။ အသက်သာရှိနေပါစေ ဘယ်နေရာ ဘယ်အခြေအနေနဲ့မဆို တရားလိုက်ပြပေးတဲ့ ဆရာတော်တစ်ပါးဖြစ်ပါတယ်။ ညဘက်ဆို သေတော့မယ် လူမမာကို နေ့ခင်းဘက် ခေါ်လာခဲ့ရင်တောင်မှ လက်ခံပြီး တရားဟော တရားပြလုပ်ပေးပါတယ်။ ဆေးရုံပေါ်က သေခါနီးလူမမာအတွက် ဘဝကူးကောင်းအောင် လူနာရှင်က ဆရာတော့်ကို ဖုန်းနဲ့ပင့်ရင်လည်း အမြန်ဆုံးအရောက်သွားပြီး တရားပြပေးတယ်လို့ သိခဲ့ရပါတယ်။

ကျွန်မတို့အဖွဲ့ကို VIP လို့ ထင်သွားလို့လားမသိဘူး။ ဆရာတော်ပြီးရင် ရိပ်သာမှာ အကြီးဆုံးဖြစ်တဲ့ မာမီကြီးလို့ခေါ်တဲ့ အမျိုးသမီးတစ်ယောက်ကို သွားခေါ်ပေးပြီး ကျွန်မတို့နဲ့တွေ့ပေးပါတယ်။ မာမီကြီးအကြောင်းကို ကျွန်မက နဂိုကထဲကသိပြီးသားဖြစ်ပါတယ်။ အငြိမ်းစား ဗိုလ်မှူးကြီးတစ်ယောက်ရဲ့ ကတော်ဖြစ်ပါတယ်။ မာမီကြီးရောက်လာပြီး ရိပ်သာအကြောင်း အသေးစိတ် ထပ်ရှင်းပြပါတယ်။ သန်လျင်သဘာဝရိပ်သာကို တည်ထောင်ထားတာ (၃) နှစ်ပဲ ရှိပါသေးတယ်။ ရိပ်သာမြေနေရာက မာမီကြီးပိုင်ဆိုင်ခဲ့တဲ့ ၉ ဧကရှိတဲ့ မြေကွက်မှာ စတင်တည်ထောင်ထားတာဖြစ်ပြီး ကပ်လျက်ရှိတဲ့မြေကြီး ၄ ဧကကို ထပ်ဝယ်ပြီးလှူခဲ့လို့ အခု (၁၃) ဧက ရှိနေပါပြီ။ ဆရာတော့်ကို ကြည်ညိုစိတ်နဲ့ မြေကွက်အလှူပြုခဲ့တာဖြစ်ပါတယ်။ ဆရာတော်က အရင်က ရန်ကုန်က ရ ထပ်မြင့်တဲ့ တိုက်ခန်းပေါ်မှာ ရိပ်သာဖွင့်ထားခဲ့တာဆိုတော့ နေရာအခက်အခဲရှိနေရာကနေ မြေအလှူရှင်ရှိလာတော့ သန်လျင်မှာပြောင်းပြီး ရိပ်သာဖွင့်ခဲ့တာဖြစ်ပါတယ်။

အဆောက်အဦးများမှာ ဆောက်လုပ်စဓမ္မာရုံတစ်ခုနဲ့ တခြား အဆောင်ကလေးတွေ အများကြီးပါ။ ယာယီ ယောဂီဆောင်တွေကို ကြည့်ခဲ့တော့ ရင်ထဲမှာ စိတ်မကောင်းဖြစ်မိပါတယ်။ ထရံကာထားတဲ့ မြေစိုက်အဆောင်တွေအတွင်းမှာ နှစ်ထပ်ကုတင်များဖြင့် ယောဂီများ ကြပ်ကြပ်တည်းတည်းနေနေကြရတာကို တွေ့ခဲ့ရပါတယ်။ အများစုမှာ အသက်အရွယ်ကြီးတဲ့ ဘိုးဘွားများနဲ့ နာမကျန်းဖြစ်နေတဲ့ လူမမာများဖြစ်ကြပါတယ်။ တချို့ လူမမာတွေကိုတော့ ယောဂီအချင်းချင်းစောင့်ရှောက်ပေးပြီး တချို့ရောဂါဆိုးတဲ့ လူမမာကိုတော့ စောင့်ရှောက်ဖို့အဖော်ပါ ပါလာစေပြီး စောင့်ရှောက်တဲ့သူကိုလဲ ရိပ်သာယောဂီအနေနဲ့ တရားအားထုတ်စေပါတယ်။

ယောဂီများ တရားအားထုတ်ချိန်ကို တစ်နေ့ (၆) ကြိမ်သတ်မှတ်ထားပါတယ်။ ယောဂီအားလုံးတရားအားထုတ်ကြရပြီး မထိုင်နိုင်တဲ့ လူမမာများကိုတော့ သီးခြားအခွင့်အရေးအနေနဲ့ လျှောင်းလျှက် အားထုတ်ခွင့်ပြုထားပါတယ်။ တရားအားထုတ်တဲ့ ဓမ္မာရုံက မြေကြီးပေါ်မှာပဲ မြေစိုက် ဓမ္မာရုံပါ။ ထိုင်ဖို့အတွက် သစ်သား (သဘာဝအတိုင်း) ပင်စည်ကနေ ဖြတ်ထားတဲ့ပုံအတိုင်း ခင်းထားတယ်။ လုံးဝဂီလာနဖြစ်နေပြီဆိုရင်တော့ အဆောင်ထဲမှာပဲထားပြီး ဘေးနားမှာ စပီကာလေးတစ်ခုနဲ့ ၂၄ နာရီ တရားဖွင့်ပေးထားပါတယ်။

မိုးတွေတအားသဲလာတော့ ကျွန်မတို့လဲ နေရာစုံအောင် လျှောက်မကြည့်နိုင်ခဲ့ပါဘူး။ မာမီကြီးရှိတဲ့အဆောင်ကိုပဲ ပြန်လာခဲ့ပြီး မာမီကြီးပြောတာကို ထပ်နားထောင်ခဲ့ကြပါတယ်။ ကျွန်မတို့သိချင်တဲ့ လူမမာတွေကို ဆေးဝါးကုသမှုအပိုင်းကို မေးကြည့်တဲ့အခါမှာတော့ မာမီကြီးရဲ့ သားနဲ့သမီးက ဆရာဝန်တွေဖြစ်ပြီး အလှည့်ကျ တစ်ရက်ခြားလာကြည့်ပါတယ်တဲ့။ အထူးကုဆရာဝန်ကြီးတစ်ယောက်က တစ်ပါတ်တစ်ခါလာကြည့်ပါတယ်တဲ့။ တိုင်းရင်းဆေးဆရာလဲ မကြာခဏလာကြည့်ပေးပါတယ်တဲ့။ ဆေးခန်းသီးသန့်မထားတာကတော့ ဓမ္မရိပ်သာဖြစ်လို့ ဓမ္မနဲ့သာ ကုသပေးတဲ့ရိပ်သာဖြစ်နေလို့ ဖြစ်ပါတယ်။

ဆရာတော်ရဲ့ တရားကိုတော့ ကိုယ်တိုင်လဲ မနာခဲ့ဖူး၊ စာအုပ်တွေလဲ မဖတ်ဖြစ်ခဲ့လို့ ကျွန်မရဲ့ တရားနဲ့ပတ်သက်နဲ့ အမြင်ကိုတော့ မရေးပြနိုင်သေးပါဘူး။ ရင်ထဲမှာတော့ ခံစားချက်တစ်ခုဖြစ်သွားခဲ့ပါတယ်။ နေရေးထက် သေရေးခက်တဲ့အချိန်မှာ သေရေးအတွက် အကူအညီပေးနေတဲ့ ဆရာတော့်ကို အလွန်လေးစားမိပါတယ်။ ခိုကိုးရာမဲ့ဖြစ်နေတဲ့ ဘိုးဘွားတွေကို လက်ခံစောင့်ရှောက်ပေးထားတဲ့ ဆရာတော့်မေတ္တာကိုလဲ အလွန်ချီးကျူးမိပါတယ်။ မာမီကြီးလို့ခေါ်ကြတဲ့ အန်တီကြီးရဲ့ စကားတွေကနေ သူ့ရဲ့စေတနာနဲ့ တရားပြည့်ဝမှုတွေကို မြင်တွေ့ခဲ့ရပါတယ်။ ကျွန်မတို့အဖွဲ့လဲ တစ်ယောက်တစ်မျိုး ရင်ထဲမှာ ခံစားသွားကြရပါတယ်။ ကျွန်မလို လခစားပိုက်ဆံသိပ်မရှိတဲ့လူတောင်မှ လှူချင်စိတ်တွေ တဖွားဖွားပေါက်လာခဲ့ပါတယ်။ အဖွဲ့လိုက် စုပေါင်းအလှူတစ်ခုပြုဖြစ်ခဲ့ကြပါတယ်။ နောင်အလျဉ်းသင့်လျှင် ဆရာတော့်တရားကိုပါ မြည်းစမ်းကြည့်ရင်း ငွေကြေးအဆင်ပြေလျှင်လည်း သွားရောက်လှူဒါန်းအုန်းမည်ဟု စိတ်ထဲမှာ တေးမှတ်ထားလိုက်ပါတော့တယ် ….

သဘာဝရိပ်သာကနေထွက်ပြီးနောက် ကျောက်တန်းရေလည်ဘုရားကို သွားဖူးခဲ့ပြီး ရန်ကုန်ကို တိုက်ရိုက်ပြန်ခဲ့ပါတယ်။ ကျောက်တန်းရေလည်ဘုရားကတော့ ပို့စ်ခဏခဏတင်ဖူးသူတွေရှိလို့ ထပ်မရေးတော့ပါဘူး။

ပထမနေ့ ခရီးစဉ် ပြီး၏ ….