၆ ကြိမ်မြောက် ကိုရီးးယားရုပ်ရှင်ပွဲတော်တက်ရောက်မည့် မင်းသားချွိုင်ဆိုဂျောင်းနှင့် မင်းသမီးဆိုရီယွန်တို့ရောက်ရှိ

အောက်တိုဘာလ(၂၁) ရက်နေ့ တွင် ကျင်းပမည့် (၆ )ကြိမ်မြောက် ကိုရီးယား ရုပ်ရှင်ပွဲတော်သို့ တက်ရောက်မည့် ကိုရီးယားမင်းသား ချွိုင်ဆိုဂျောင်းနှင့် မင်းသမီး ဆိုရီယွန်တို့သည် အောက်တိုဘာလ ၂ဝ ရက်နေ့ ညနေ ၆ နာရီ ၄၅ မိနစ်အချိန်က ထိုင်းနိုင်ငံမှတဆင့် ရန်ကုန်မြို့သို့ ရောက်ရှိလာပြီဖြစ်သည်။

၂၀၁၁ ခုနှစ်အတွက်မြန်မာနိုင်ငံတွင် ကျင်းပသည့် ၆ ကြိမ်မြောက် ကိုရီးယားရုပ်ရှင်ပွဲတော်ကို Junction Center  မော်တင်တွင် အောက်တိုဘာလ ၂၁ ရက်နေ့မှ ၂၄ ရက်နေ့အထိ ကျင်းပမည်ဖြစ်ပြီး မြန်မာ့ရုပ်မြင်သံ ကြားမှထုတ်လွှင့်ပြသခဲ့သည့် “သစ္စာ နှလုံးသား” ကိုရီးယားဇာတ်လမ်းတွဲမှ မင်းသားချိုဆူဂျောင်း(ဒယ်ဂျိုယောင်း) နှင့် “အနားမညီ” ဇာတ်လမ်းတွင် ချယ်လင်းအဖြစ်နှင့် “ရတနာစံအိမ်” ဇာတ်လမ်းတွဲတွင် ပတ္တမြားအဖြစ် မြန်မာပရိသတ်သိခဲ့သည့် မင်းသမီး ဆိုရီယွန်တို့သည် အောက်တိုဘာလ ၂၁ ရက်နေ့တွင် ပြုလုပ်မည့်ရုပ်ရှင်ပွဲတော် ဖွင့်ပွဲအခမ်းအနားသို့ တက်ရောက်ကြမည်ဖြစ်သည်။

ထို့ပြင် အောက်တိုဘာလ ၂၂ ရက်နေ့မွန်းလွဲ နှစ်နာရီခွဲတွင် ဓမ္မစေတီလမ်းနှင့် ရွှေတောင်ကြား(၁)လမ်းထောင့်ရှိ City Mart တွင် ကျင်းပပြုလုပ်သွားမည့် Discover Korea Food Show ၏ဖွင့်ပွဲအခမ်းအနားကိုလည်း တက်ရောက်ဖွင့်လှစ်ပေးမည့်အပြင် မင်းသမီးဆိုရီယွန်(ချယ်လင်း)က ကိုရီးယားထမင်းသုပ်ကို လက်တွေ့ပြုလုပ်ပြသ ပေးသွားမည်ဖြစ်ကြောင်း သိရှိရပါသည်။

Eleven Media Group မှ ကူးယူဖော်ပြပါသည်။