စပ်မိ စပ်ရာ (၆)

လ္ဘက်ရည်ဆိုင်ကို လူအတော်များများ ထိုင်ဖူးကြပါတယ်။ လ္ဘက်ရည်ဆိုင် ထိုင်တာကို အလကား အလုပ်မရှိလို့ အချိန်ဖြုန်း နေတာလို့ မြင်တဲ့သူတွေ ရှိသလိုဘဲ မနက်စောစော လ္ဘက်ရည်လေး တစ်ခွက်လောက်မျှ မသောက်ရလျှင် ကျန်တဲ့အလုပ် မလုပ်နိုင်တဲ့သူလည်း ရှိပါတယ်။ လ္ဘက်ရည်ဆိုင် ထိုင်တာကို ကောင်းတယ်၊ မကောင်းဘူး အဓိက ပြောချင်တာ မဟုတ်ဘဲ ကျွန်တော့်အမြင်ကို တင်ပြခြင်းတာ ဖြစ်ပါတယ်။

မနက်စောစော အပြေးလေ့ကျင့်၊ လမ်းလျှောက်၊ ယောဂလုပ် စတဲ့အားကစားတွေ လုပ်ပြီးတဲ့အခါ မိတ်ဆွေတွေစုပြီး မနက်စာစားဖို့ လ္ဘက်ရည်ဆိုင် ထိုင်တာတွေ ရှိတယ်။

တစ်ချို့ မိသားစုတွေ ကလည်း မနက်စာစားဖို့ တစ်ယောက်တစ်မျိုး ကိုယ်ကြိုက်တာ မှာစားလို့ရတော့ လ္ဘက်ရည်ဆိုင် ထိုင်ကြတယ်။

တစ်ချို့လည်း မတွေ့တာ ကြာပြီဖြစ်တဲ့ မိတ်ဆွေကို သွားလာရင်းတွေ့လို့ စကားပြောရအောင် နီးစပ်ရာ လ္ဘက်ရည်ဆိုင် ထိုင်ကြတယ်။

တစ်ချို့ စီးပွားရေးသမား၊ ကုန်သည်၊ ပွဲစားတွေကလည်း အလုပ်ကိစ္စ ပြောဆိုဖို့ လ္ဘက်ရည်ဆိုင် ထိုင်ကြတယ်။

တစ်ချို့ ကုမ္ပဏီ မားကက်တင်း အဖွဲ့တွေလည်း နေ့လည်စာစားရင်း ခဏနားရအောင် လ္ဘက်ရည်ဆိုင် ထိုင်ကြတယ်။

ရပ်ကွက်တွေမှာ ဆိုရင်လည်း လူငယ်၊လူကြီး အမျိုးမျိုးဟာ သူငယ်ချင်း အပေါင်းအသင်းတွေနဲ့ စကားပြော လေကန်ဖို့ လ္ဘက်ရည်ဆိုင် ထိုင်ကြတယ်။

အခုဆိုရင် ညဖက် ဘောလုံးပွဲ ရှိတဲ့နေ့ဆိုရင် ဘောလုံးပွဲကြည့်ဖို့ လ္ဘက်ရည်ဆိုင်မှာ နေရာယူထားကြတာ ထိုင်စရာနေရာတောင် မရှိတဲ့ အထိဘဲ။

လ္ဘက်ရည်ဆိုင် ထိုင်တဲ့သူတွေကို ပြောရရင် ဆုံးမှာမဟုတ်ပါဘူး။ ကျွန်တော် အဓိက ပြောချင်တာက လ္ဘက်ရည်ဆိုင် ထိုင်တဲ့လူတွေအကြောင်း မဟုတ်ပါဘူး။ လ္ဘက်ရည်ဆိုင် ထိုင်ရင်း ကျွန်တော်တွေ့ကြုံ ခံစားရတာကို ပြောချင်တာပါ။

အကယ်၍ သင်ဟာ အလုပ်မှာဘဲဖြစ်ဖြစ်၊ အိမ်မှာဘဲဖြစ်ဖြစ် စိတ်ညစ် စိတ်ရှုပ်နေရင် လ္ဘက်ရည်ဆိုင်မှာထိုင်ပြီး ဘာမှမတွေးဘဲ စိတ်ကိုလွှတ်ထားပါ။ နောက်ပြီး ဆိုင်ရှေ့က ဖြတ်သွားတဲ့ သူတွေကို လိုက်ငေးကြည့် ကြည့်ပါ။ ဒါမှမဟုတ် ဘေးဝိုင်းတွေက စကားပြောတာတွေကို နားထောင်နေ ကြည့်ပါ။ သင်ဟာ မကြာမီ စိတ်ညစ် စိတ်ရှုပ်တာ ပျောက်သွား ပါလိမ့်မယ်။ သင့်မှာ အခြားနည်းမရှိရင် စမ်းကြည့်စေချင် ပါတယ်။