============================

A

သူသည် A ဆိုသော အမည်ဖြင့် Bank ကြီးတစ်ခု၏ မန်နေဂျာချုပ်တာဝန် ထမ်းဆောင်နေသည်။
အလုပ် အင်မတန်များသော သူ့ကို သည်နေ့မနက် တွေ့ခွင့်မှ မရလျှင် ဘဏ်ကို မီးရှို့ပြာချပစ်တော့မလို
အသည်းအသန်ဖြစ်နေသော အမျိုးသမီးတစ်ယောက် ဘဏ်ထဲရောက်နေကြောင်း သတင်းလာပို့သောအခါ…
သူ…အလွန်တရာ စိတ်ရှုပ်သွားပါသည်။

သို့သော် ထိုအမျိုးသမီးသည် အရေးကြီးသော အကြောင်းကိစ္စတစ်ခုခု ရှိ၍သာ ဤမျှတောင်းဆိုသမှု ပြုခြင်းဖြစ်မည်ဟု တွေးမိပြီး…
သူ…ထိုအမျိုးသမီးနှင့် တွေ့ဆုံဖို့ လက်ခံလိုက်သည်။

—————————

B

အမျိုးသမီးသည် အသက်ခပ်ကြီးကြီးဖြစ်ပြီး B ဟူသည့်အမည်ရှိ… အတန်ငယ်အူတိအူကြောင်နိုင်သူသာ ဖြစ်သည်။
B ဆိုသည့် အမျိုးသမီးကြီးသည် A ၏ ရုံးခန်းထဲ ဝင်လျှင်ဝင်ချင်းမှာပင်.. Aကို စိမ်းစိမ်းကြီး ကြည့်ပြီး…
”ရှင် …မနက်ဖြန်ရောက်ရင်… ရှင့်တင်ပါးမှာ ဆေးမှင်ကြောင် ထိုးမှာ မဟုတ်လား” ဟု ပြောလေသည်။

A သည် ရုတ်တရက်တော့ ကြောင်တိကြောင်တာ ဖြစ်သွားပြီး နောက်… ခွက်ထိုးခွက်လန် ရယ်ချလိုက်မိသည်။
ဘယ်နှယ်…ဒီမိန်းမကြီးက…တစ်ထစ်ချ လာပြောနေတာ… ပေါက်တီးပေါက်ကရတွေ… ဟု တွေးပြီး..
”ကျုပ်က ဘာလို့ တင်ပါးမှာ တက်တူးထိုးရမှာတုန်းဗျ ။ ဘယ်တော့မှ မထိုးဘူး ။ ” ဟု အသေအချာ ပြန် ငြင်းဆိုလိုက်သည်။
B ကလည်း မလျှော့ရေးချ မလျှော့ချေ။

B = ”ရှင့်တင်ပါးမှာ တက်တူး ထိုးကို ထိုးမှာပါ.. ။ မနက်ဖြန်မှာ ရှင် ထိုးကို ထိုးလိမ့်မယ်..။”

A = ”လုံးဝ မထိုးဘူး။ ကျုပ်ကိုယ်တိုင်က မထိုးဘူးဆိုရင်… ခင်ဗျားက ပိုသေချာအုန်းမှာလား..”

B =” သေချာပါတယ်…ရှင် မနက်ဖြန် တက်တူး ထိုးကို ထိုးမှာ… ။ ဘာပုံ ထိုးမလဲ ဆိုတာတောင် ပြောပြနိုင်သေးတယ်။”

A =” အောင်မာ… ကဲ…ပြောပါအုန်း…ဘာပုံ ထိုးမယ်လို့ အတတ်ပြောနိုင်တာတုန်း…”

B = ”နဂါးပုံ ထိုးမှာလေ… ဒါပေမယ့် တက်တူးဆရာခပ်ညံ့ညံ့နဲ့ တွေ့ပြီး..နဂါးပုံမပေါက်ပဲ… အာပြဲခြောက်ပုံစံပဲ ထွက်လာမှာ…”

A =” ဖြစ်မှ ဖြစ်ရလေ… လုံးဝ လုံးဝ အဓိပ္ပါယ် မရှိတဲ့ နိမိတ်ဖက်စကားပဲ… ။ ကိုင်း… ခင်ဗျားဘက်ကလည်း… ကျုပ်တက်တူးထိုးလိမ့်မယ်ဆိုတာ
သေချာပေါက် လာပြောနေတယ်… ကျုပ်ဘက်ကလည်း မထိုးဘူးဆိုတာ သေချာနေတယ်။ ဒီတော့… အလောင်းအစားလုပ်မလား..”

B = ”စိန်လိုက်လေ…လောင်းမယ်။ ရှင် မနက်ဖြန် ရှင့်တင်ပါးမှာ တက်တူး ထိုးကို ထိုးမှာ ။”

A = ”တကယ်လို့ ကျုပ်မထိုးရင်… ကျုပ်ကို သိန်းတစ်ရာ ပေးရမယ်…”

B =” ပေးမယ်.. ။ တကယ်လို့ မနက်ဖြန် ရှင့်တင်ပါးမှာ ရှင်…တက်တူးထိုးမိတယ်ဆိုရင် ကျွန်မကို သိန်းတစ်ရာ ပေးရမယ်။”

A = ”အိုကေ… ။ သန်ဘက်ခါ မနက်ကျရင်..ခင်ဗျား ငွေသိန်းတစ်ရာ ယူပြီး ဒီကို လာခဲ့.. ။”

B =” ကောင်းပြီ။ ကျွန်မ လာရင် ရှင် သိန်းတစ်ရာ ပေးဖို့ အသင့်ပြင်ထား။”

=============================================

C

 

 

B နှင့် အလောင်းအစားလုပ်ထားမိသည့်နောက်… A သည် သူ၏တင်ပါးတွင် တက်တူးမထိုးမိအောင် နေရသည်။
သိပ်တော့ အပန်းမကြီးပါ။ ဘယ်တုန်းကမှ တင်ပါးမှာ တက်တူးထိုးဖို့ ဆန္ဒလည်း မရှိ။
အလောင်းအစားလုပ်လိုက်သည်မှာလည်း A ဘက်က 100% သေချာနေ၍သာ ဖြစ်သည်။

သည်နေ့မနက်… ဟိုအမျိုးသမီးကြီး လာလိမ့်မည်။ သူမထံမှ ငွေ သိန်းတစ်ရာ ရမည်။ သေချာပါသည်။

.ဟော…ပြောရင်းဆိုရင်း…B ဆိုသည့် အမျိုးသမီးကြီး လာလေပြီ။

သို့သော် B နှင့်အတူ… နောက်ထပ် အမျိုးသားကြီးတစ်ယောက် ပါလာသည်။

A က… ဆီးကြို၍ ပြောလိုက်သည်။

A = ”ကိုင်း…ခင်ဗျား ရှုံးပြီ။”

B =” သေချာလို့လား.. ။ ကျွန်မ ရှုံး မရှုံး သေချာဖို့.. ရှင့် တင်ပါးကို ပြဖို့ လိုတယ်..”

အင်း..သိန်းတစ်ရာ ရမှာပဲ… တင်ပါးကို ပြရတာ တန်ပါတယ်.. ။ ချွတ်ပြလိုက်ရုံပ…
A = ”ရတယ်လေ… ။ ဒီမှာကြည့် …”

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

A က … သိန်းတစ်ရာ မြန်မြန်ရရင် ပြီးရော ဆိုပြီး… တင်ပါးကို ချွတ်ပြလိုက်ရာ…
B ရော… B နှင့် အတူပါလာသော C ဆိုသည့် အမျိုးသားကပါ… သေချာ ကြည့်ကြသည်… ။

A က…တင်ပါးချွတ်ပြပြီးသည်နှင့်… ပေး…. သိန်းတစ်ရာ ဟု…တောင်းဆိုလိုက်သည်။

B က .. A ကိုတော့…”အေး ပေးရမှာပေါ့.. ”ဆိုကာ ..
C ဘက်ကို လှည့်ပြီး.. ”တွေ့တယ်မဟုတ်လား.. သူ တင်ပါးလှန်ပြတယ်”ဟု ပြောလိုက်သည်။

C က… သူ့နဖူးသူ လက်ဝါးနှင့်ဖြောင်းခနဲရိုက်လိုက်ပြီး…”.သေရော… ကျုပ်ရှုံးပါပြီ…”ဟု အော်ကာ…
အဆင်သင့်ပါလာသည့် အိတ်အတွင်းမှ… ငွေ သိန်း ၂ရာကို B အား … ထုတ်ပေးလေတော့သည်။

 

 

 

 

 

 

 

 

 

 

 

 

 

 

 

 

 

 

 

B က.. C ပေးသော ငွေ သိန်း၂ရာထဲမှ တစ်ဝက်ခွဲပြီး သိန်းတစ်ရာကို ဘက်ခနဲပစ်ကာ Aအား မဆိုင်းမတွ ပေးလေသည်။

< C ကတော့… သိန်းနှစ်ရာ ပေးပြီးသည်နှင့်… စိတ်ပျက်လက်ပျက်ဖြစ်ကာ..ခေါင်းတခါခါလုပ်ပြီး..အပြင်ပြေးထွက်သွားတော့သည်။ >

သို့သော်… B နှင့် C ကို သိပ် မသင်္ကာသဖြင့် A က အကျိုးအကြောင်း မေးမိသည်။

A = ”ဒါနဲ့  ခင်ဗျားတို့က ဟိုငွေ သိန်းနှစ်ရာနဲ့ ဘာတွေ အပေးအယူလုပ်ကြတာဒုန်း”
B  = ”ဒီလိုရှင့် C နဲ့ ကျွန်မ.. အလောင်းအစားတစ်ခု လုပ်ထားတယ်။ ဘဏ်မန်နေဂျာချုပ်ကြီးက တင်ပါးလှန်ပြလိမ့်မယ်လို့ ကျွန်မ ပြောတာကို
C က မယုံဘူးလေ.. ရှင့်လိုလူက ဘာအကြောင်းနဲ့မှ… ကျွန်မတို့ကို တင်ပါးလှန်ပြမှာမဟုတ်ဘူးဆိုပြီး ပြန်ငြင်းနေလို့ သိန်းနှစ်ရာကြေး လောင်းလိုက်တာ…။
အခုတော့ C  ရှုံးသွားပြီ..။”

 

တိန် တိန် (နှစ်ခါတိန်)

 

 

 

 

 

 

 

 

 

 

 

 

:k:     :k:   :k:    :k:   :k:

============================================

(ဟာသတစ်ပုဒ်ကို ကိုယ့်ပုံစံနဲ့ကိုယ် ပြန်ရေးထားခြင်းဖြစ်သည်။)