ဘုရားသခင်မုန်းတဲ့ လေဒီဂါဂါ…

လေဒီဂါဂါရဲ့ နယ်လှည့်တေးဂီတ ဖျော်ဖြေပွဲမှာ အငြင်းပွါးဖွယ်ရာ ရှေးရိုးစွဲ ခရစ်ယာန် ဘာသာဝင်တွေရဲ့ ဆန့်ကျင်ကန့်ကွက်မှုတွေနဲ့ ထိပ်တိုက်ရင်ဆိုင် ကြုံတွေ့ခဲ့ရတယ်လို့ ဆိုပါတယ်။

အဲဒီလို ဆန့်ကျင်ကန့်ကွက် သူတွေကို လေဒီဂါဂါ ကတော့ “မုန်းတီးခြင်း ဥပဒေကို ကျူးလွန်တဲ့ ရာဇဝတ်သားများ”လို့ စွတ်စွဲ မှည့်ခေါ် လိုက်တယ်လို့လည်း သိရပါတယ်။

လေဒီဂါဂါဟာ လိင်တူချင်း ချစ်သူတွေနဲ့ ပတ်သက်တဲ့ အကြောင်းအရာတွေကို လူတွေ ပိုမို သိနားလည်လာအောင် စည်းရုံးလှုံ့ဆော်မှုတွေ လုပ်နေတယ်လို့ ထင်မြင်ယူဆ သူတွေက “ဘုရားသခင်ဟာ လေဒီဂါဂါကို မုန်းတယ်” ဆိုတဲ့ ဆိုင်းဘုတ်တွေကို ကိုင်ဆွဲပြီး ဆန့်ကျင် ဆန္ဒပြကြတယ်လို့လည်း သိရပါတယ်။

ကိုယ့်ကိုယ်ကို လိင်တူလိင်ကွဲ နှစ်ခုစလုံးကို ကြိုက်နှစ်သက်တဲ့ သူဖြစ်ကြောင်း ပွင့်ပွင့်လင်းလင်း ထုတ်ပြန်ကြေညာထားတဲ့ ဂါဂါဟာ လိင်တူချစ်သူတွေ အခွင့်အရေး တန်းတူရရှိရေးနဲ့ ပတ်သက်လို့ စွမ်းစွမ်းတမံ စည်းရုံးလုပ်ဆောင်နေတဲ့ သူတယောက်လည်း ဖြစ်ပါတယ်။

အဲဒီဖျော်ဖြေပွဲ အစီအစဉ်ကို မစခင်မှာ ဂါဂါက Twitter အင်တာနက် သတင်းအမြန် ပေးပို့ဖြန့်ချီတဲ့ ကွန်ယက်ကနေပြီး သူ့ရဲ့ပရိသတ်တွေဆီကို “ကျမတို့ ဖျော်ဖြေရေး အခမ်းအနားရဲ့ အပြင်ဖက်မှာ မုန်းတီးရေးကို လှုံ့ဆော်နေတဲ့ အဖွဲ့အစည်းတွေ ရောက်ရှိလို့ နေပါတယ်။ အန္တရာယ်ရှိနိုင်တဲ့ အတွက်ကြောင့်မို့ အားလုံးသတိရှိကြပါ။ ဒါပေမယ့် အရမ်းတော့ မစိုးရိမ်ပါနဲ့။ ဒီလိုမုန်းတီးရေးကို လှုံ့ဆော်နေတဲ့ ရာဇဝတ်ကောင်တွေရဲ့ ရိုင်းဆိုင်းကြမ်းတမ်းတဲ့ စကားလုံးတွေ၊ အကြမ်းဖက်မှုကို သရုပ်ပြနေတဲ့ အပြောအဆိုတွေကနေ ကျမကာကွယ်ပေးပါ့မယ်။ ဒေသခံ အာဏာပိုင်တွေနဲ့ ပရိသတ်ကြီးကို ကျမတောင်းဆိုချင်တာကတော့ အဲဒီလူတွေရဲ့ နှုတ်ထိုး ရန်တွေ့ချက်တွေကို ကျေးဇူးပြုပြီး ဘာမှ တုံ့ပြန်မှု မပြုလုပ်ပေးကြဖို့နဲ့ သူတို့ကိုပြန်ပြီး ရန်မတွေ့ကြဖို့ အနူးအညွတ် တောင်းဆိုချင်ပါတယ်” လို့ သတင်း ပေးပို့ခဲ့တယ်လို့ သိရပါတယ်။

အဲဒီအပြင် “မလိုမုန်းထား ပြောဆိုစွတ်စွဲနေတဲ့ အရည်မရ အဖတ်မရ စကားလုံးတွေကြောင့် ကိုယ့်ရဲ့ စိတ်ခံစားချက်ကို အညှိုးအနွမ်း မခံကြပါနဲ့။ ရှင်တို့က အဲဒီအပြင်မှာ ဟစ်အော်သောင်းကြမ်းနေတဲ့ သူတွေထက် ပိုပြီးကံကောင်းတဲ့သူတွေ ပိုပြီးကောင်းချီးမင်္ဂလာ ခံစားနေရတဲ့ သူတွေလို့ ပြန်မှတ်ယူလိုက်ပါ။ ပြီးတော့ ရှင့်တို့ရဲ့ စိတ်နှလုံးသားထဲကနေ သူတို့အတွက်ကို ဆုတောင်းပေးကြပါ” လို့ ပရိသတ်ကြီးကို ထပ်လောင်း အားပေးခဲ့တယ်လို့လည်း သိရပါတယ်။

အမေရိကန် အခြေစိုက် Westboro နှစ်ချင်း အသင်းတော်ဟာ အရှေ့အလည်ပိုင်း စစ်မြေပြင်မှာ ကျဆုံးခဲ့တဲ့ စစ်သားတွေရဲ့ ဈာပနာအခမ်းအနားမှာ “ဘုရားသခင်ဟာ အခြောက်၊ ဂန်ဒူးတွေကို မုန်းတယ်” ဆိုတဲ့ ဆိုင်းဘုတ်တွေ ထောင်ခဲ့တဲ့ အတွက်ကြောင့်မို့ လူသိများတဲ့ အသင်းတော် တစ်ခုဖြစ်ပါတယ်။

အဲဒီလို ကျဆုံးသွားတဲ့ စစ်သားတွေရဲ့ ဈာပနာအခမ်းအနားမှာ ဒီလိုမုန်းတီးရေး ဆောင်ပုဒ်တွေကို လွှင့်ထူရတဲ့ အဓိက အကြောင်းအရင်းက အမေရိကန်နိုင်ငံမှာ လိင်တူချင်း လက်ထပ်တာကို စပြီး လက်ခံလာတာမို့လို့ ဘုရားသခင်က အမေရိကန်နိုင်ငံကို ပြစ်ဒဏ်ချမှတ်တဲ့ အနေနဲ့ အခုလို စစ်သားတွေကို စစ်မြေပြင်မှာ သေစေတာ ဖြစ်တယ်လို့ အဲဒီအသင်းတော်က ယုံကြည်လက်ခံထားတာ ဖြစ်ပါတယ်။

အဲဒီ Westboro နှစ်ချင်း အသင်းတော်ရဲ့ ပြောရေးဆိုခွင့်ရှိသူ အမျိုးသမီး Shirley Phelps-Roper က ဒီနှစ် နှစ်ဦးပိုင်းမှာ ကတည်းကနေ ကျမတို့က လေဒီဂါဂါရဲ့ စတိတ်ရှိုးတိုင်းကို လိုက်ပြီးတော့မှ ဆန္ဒပြကြမှာ ဖြစ်တယ်။ ပြီးရင် “ဘုရားသခင်က လေဒီဂါဂါကို မုန်းတယ်။ လေဒီဂါဂါသီချင်း နားထောင်တဲ့ သူတွေအားလုံး ငရဲရောက်မှာ ဖြစ်တယ်လို့ ကြွေးကြော်ခဲ့တာ ဖြစ်ပါတယ်။

အဲဒီအပြင် သူမက ဘာကြောင့် ဒီလိုလုပ်ရသလဲ ဆိုလို့ရှိရင် ကျမ်းစာမှာ လိင်တူဆက်ဆံခြင်းကို ကျမ်းစာက တားမြစ်ထားတယ် ဘုရားတားမြစ်ထားတာမို့လို့ ဆန့်ကျင်ပြီး လိင်တူချစ်သူတွေ ပိုမိုများပြားလာအောင် လှုံ့ဆော်ပေးနေတဲ့ ဒီကောင်မရဲ့ပါးစပ်ကို ကျမတို့ ပိတ်ကို ပိတ်ရမယ်လို့ ထပ်လောင်း ပြောဆိုခဲ့ပါသေးတယ်။