ကြုံတွေ့နေရ လုပ်ငန်းခွင်ဘဝ (ခရီးသွားလုပ်ငန်း) – ၂

ဟိုတယ်ပိုင်းမှာ ကျန်ခဲ့တာလေးတစ်ခုက contract rate ထွက်တာ နောက်ကျတာပါ။ ဒီလိုအချိန်မျိုးမှာ အလုပ်တွေအပြည့်လုပ်နေရတဲ့ဘဝကို နားလည်ပါတယ်။ ဟိုတယ်စီမံခန့်ခွဲရေးပိုင်း၊ reservation ပိုင်းတွေကြောင့် ဖုန်းမဖြေနိုင်၊ paper work တွေမနိုင်တာ ဖြစ်နေတာတွေကို တွေ့နေရတော့ စာချုပ်တွေဘက်ကို မလှည့်နိုင်တာကိုလည်း သဘောပေါက်ပါတယ်။ ဒါပေမယ့် ကျွန်မတို့ဘက်မှာကျတော့ rate က အရမ်းအရေးကြီးပါတယ်။ အနည်းဆုံးတော့ တစ်နှစ်စာလောက် ကြိုရနေမှ အဆင်ပြေမှာပါ။ အရင်ကတော့ rate မထွက်သေးလည်း အရင်နှစ်တွေကိုကြည့်ပြီး မှန်းပေးလိုက်တာမျိုးတွေ၊ တစ်ခါတစ်လေကျတော့လည်း “ဘယ်ဈေးနှုန်းလောက် ဖြစ်သွားနိုင်လဲ၊ ခန့်မှန်းခြေလေး ပြောပေးပါလား“ လို့ ဟိုတယ်ကိုမေးပြီး ဈေးတွက်ပေးလိုက်တာမျိုးတွေ လုပ်လေ့ရှိပါတယ်။ ဒါပေမယ့် မနှစ်က အခန်းဈေးနှုန်းတွေက 300% လောက်အထိ ခုန်တက်သွားတာကို ကြုံရပြီးတဲ့နောက်ပိုင်းတော့ ဈေးလည်း မမှန်းရဲတော့ပါဘူး။ ဟိုတယ်တွေကလည်း မှန်းမပေးတော့ပါဘူး။ ဒီတော့ မေးလာသမျှတွေကိုလည်း ဈေးပေးလို့ မရသေးတဲ့အကြောင်း၊ ရှိတဲ့ဈေးနဲ့ပဲ ပေးလို့ရသေးတဲ့အကြောင်း၊ contract အသစ်ရရင် ဈေးအသစ်ပြန်ပေးပါမယ်ဆိုတဲ့အကြောင်း အဖန်တလဲလဲ ရှင်းပြရပါတယ်။ ဒီကြားထဲ ဟိုဘက် agent တွေကလည်း အခြေအနေကို နားမလည်ပေးရင်၊ ဒါမှမဟုတ် သူတို့ဆီနဲ့မတူလို့ သဘောမပေါက်ရင် ဒီမေးခွန်းတစ်ခုတည်းအတွက်နဲ့ပဲ အကြိမ်တစ်ရာလောက် ဖြေနေရလို့ စိတ်လည်းတိုရပါတယ်။

နောက်တော့ သူတို့က တစ်ဆင့်လျှော့ပါတယ်။ “ရှိတဲ့ဈေးနဲ့ပဲ ပေးထားပါ၊ ဒါပေမယ့် ဘယ်လောက်ရာခိုင်နှုန်း တက်သွားနိုင်လဲ မှန်းပေးပါ” တဲ့။ ဒီမေးခွန်းကို ဖြေမယ့်အစား ကျားမြီးသာ ပြေးဆွဲချင်စိတ်ပေါက်ပါတယ်။ ဖြေလိုက်ရပြန်ပါပြီ.. “မနှစ်က အခြေအနေတွေအရ မှန်းပေးလို့ မရပါဘူး” လို့။ ဆိုတော့ သူတို့က နောက်တစ်မျိုး ဖြစ်ပြန်ပါတယ်။ နာမည်အတိအကျ၊ လူဦးရေအတိအကျ၊ ရက်အတိအကျပေးပြီး လုံးဝသေချာတဲ့ဖိုင်အတွက် booking တင်ရင်းနဲ့အတူ rate ပါ တောင်းပေးပါတဲ့။ အဲဒီလောက်များ လွယ်နေရင် ကျွန်မတို့တွေ ဒီလောက်စိတ်ပင်ပန်းဖြစ်မနေပါဘူး။ နောက်ဆုံးတော့ ကျွန်မတို့အဖြစ်က ဘယ်အရာကိုမှ တိတိပပမသိဘဲ၊ ဘာဖြစ်လာမယ်ဆိုတာလည်းမသိဘဲ အလုပ်လုပ်နေရဘဝမို့ မျက်နှာပန်းမလှတဲ့အခြေအနေ ဖြစ်နေပါတယ်။

(တစ်ခုပြောချင်တာက ဒီစာကိုရေးတာဟာ ဘယ်သူ့ကိုမှ အပြစ်ပြောချင်တာ မဟုတ်ဘဲ ကျွန်မတို့ရုံးပိုင်းဆိုင်ရာအလုပ်မှာ အဆင်မပြေမှုတွေကို ပြောပြချင်ရုံသက်သက်ပါလို့။)

လေကြောင်းလိုင်းများ-

လောလောဆယ် လေကြောင်းလိုင်း (၆)လိုင်းကို သုံးနေပါတယ်။ Air Bagan၊ Air Mandalay၊ Air Kanbawza၊ Asian Wings၊ Yangon Airways…နောက် Myanma’s Airways က လေယာဉ်အသစ်ကြီးတွေကို Ticketing Agent တစ်ခုက charter ထပ်ဆွဲပေးတဲ့အတွက် Myanma’s Airways-Special…အားလုံးပေါင်း (၆) ခုပါ။ အခုဆို Golden Myanmar Airline ဆိုပြီး ဈေးနှုန်းနည်း လေကြောင်းလိုင်းတစ်ခု ထပ်ထွက်လာသလို Air Asia Airlines ကလည်း မန္တလေးကို တိုက်ရိုက်ဆင်းပေးတာမျိုးလည်း ရှိပါတယ်။ နောက်လည်း ပြည်တွင်းလေကြောင်းလိုင်းအသစ်တွေ ထပ်ထွက်ဖို့ ရှိနေပါတယ်။

လေကြောင်းလိုင်းတွေကတော့ ရရင်ရသလို confirm ပေးပါတယ်။ ဒါပေမယ့် ခက်တာက sector ပြဿနာပါ။ ဥပမာ – ခရီးစဉ်တစ်ခုမှာ လေကြောင်း (၄) ခုပါတယ်ဆိုရင် ရှိသမျှအကုန်ကို လေကြောင်းလိုင်းတစ်ခုစီကို တင်ပါတယ်။ ရတာရှိသလို မရတာလည်း ရှိပါတယ်။ ရတဲ့ Airline ကနေ ရတဲ့ sector တွေကို ယူပါတယ်။ အဲဒီမှာ sector က စကားပြောပါတော့တယ်။

ဥပမာ လေယာဉ်တစ်စင်းအနေနဲ့ ရန်ကုန် – ညောင်ဦး – မန္တလေး – ဟဲဟိုး – ရန်ကုန် ဆိုပြီး ပတ်သွားပါတယ်။ ဒါက အများအားဖြင့် သွားတဲ့ လမ်းကြောင်းပါ။ ရန်ကုန်ကစတဲ့ ခရီး (ရန်ကုန် – ညောင်ဦး၊ ရန်ကုန် – မန္တလေး၊ ရန်ကုန် – ဟဲဟိုး) ဆိုရင် booking ရဖို့ လွယ်ပါတယ်။ ကြားဖြတ်စီးမယ့် ခရီးဆိုရင်တော့ Waiting နဲ့ ရတာများပါတယ်။ confirm ရခဲ့ရင်တောင်မှ ကြားခရီးစဉ်တစ်ကြောင်းတည်းဆိုရင် လက်မှတ်ပေးမထုတ်ပါဘူး။ ကျွန်မတို့က ရန်ကုန် – ညောင်ဦး၊ ညောင်ဦး – မန္တလေး၊ မန္တလေး – ဟဲဟိုး၊ ဟဲဟိုး – ရန်ကုန် ဆိုပြီး (၄)ကြောင်းတင်ပါတယ်။ Airline တစ်ခုက ညောင်ဦး – မန္တလေးအတွက်ပဲ နေရာရပါတယ်။ တစ်ခြား Airline မှာလည်း အဲ့ဒီ sector က နေရာမရပါဘူး။ ဒါပေမယ့် ကျွန်မတို့ကို ညောင်ဦး – မန္တလေး အတွက် လက်မှတ်ပေးမထုတ်ပါဘူး။ ရန်ကုန် sector တစ်ခု ထပ်ယူမှ နှစ်ကြောင်းစာ ပေးထုတ်ပါမယ်တဲ့။ ဒါပေမယ့် သူတို့ Airline မှာ ရန်ကုန် sector အတွက်လည်း နေရာမပေးနိုင်ပါဘူး။ တော်တော်ကို အခက်တွေ့စေတဲ့ အခြေအနေပါ။ တစ်ခြား Airline တွေကို အပူကပ်ပေရော့ ဖြစ်သွားပါတယ်။

ဒါပေမယ့် ကောင်းတာ တစ်ခုက cancellation policy က အရမ်းအဆင်ပြေပါတယ်။ အမြဲတမ်းလိုလိုလည်း booking လှမ်းတိုက်လေ့ရှိပါတယ်။ ဝယ်လိုအား အရမ်းများတဲ့အတွက် တစ်ခါတစ်လေများဆို cancel ဖြစ်ရင်တောင် ဝမ်းသာပါတယ်တဲ့။

တော်တော်ဆိုးတာကတော့ အခြေအနေ မတည်ငြိမ်တာပါပဲ။ အချိန်ပြောင်းခြင်း၊ လေယာဉ်ပြောင်းခြင်း၊ ခရီးစဉ်ဖျက်သိမ်းခြင်း စတာတွေကို အချိန်ပြည့် ကြုံတွေ့ရပါတယ်။ ခရီးစဉ်တစ်ခုဆိုတာ အချိန်နဲ့ အလုပ်လုပ်နေရတာပါ။ ဘယ်နေရာကို ဘယ်အချိန်လောက်ဆိုရောက်ပြီး ဘာတွေကိုလည်မယ်ဆိုတာ အတိအကျကြီးမဟုတ်တောင် အကြမ်းဖျင်းတော့ အကုန်လုံးကို ကြိုစီစဉ်ထားရတာပါ။ ဒီတော့ လေကြောင်းလိုင်းတွေရဲ့ မတည်ငြိမ်မှုတွေနဲ့ အပြောင်းအလဲတွေက အရေးပေါ်ပြဿနာတွေ ဖြစ်လာပါတော့တယ်။ အချိန်အပြောင်းအလဲအနည်းငယ်လောက်က ကိစ္စမရှိပေမယ့် လေယာဉ်တစ်စီးလုံးကို မထွက်တော့ဘဲ cancel လုပ်ပစ်လိုက်တာ၊ လေယာဉ်ချိန်ကို မနက်ကနေ ညနေကို ရွှေ့ပစ်လိုက်တာတွေက program မှာ အရမ်းကို ထိခိုက်ပါတယ်။ အဲဒီလိုဖြစ်လာရင်လည်း တာဝန်ယူမှုဆိုတာ တော်တော်ကြီးကို ရှားပါတယ်။ ဖြစ်သမျှပြဿနာကို ခရီးသွားကုမ္ပဏီတွေကပဲ ဒိုင်ခံဖြေရှင်းပေးရတာပါ။

တစ်ခါက ကျွန်မတို့ဧည့်သည်တွေအတွက် ညောင်ဦး – မန္တလေး ညနေလေယာဉ်နဲ့ သွားဖို့ စီစဉ်ထားပါတယ်။ ဧည့်သည်က မနက်ဘက်မှာ မီးပုံးပျံစီးချင်လို့ပါ။ ကျွန်မတို့အခေါ် Balloon Over Bagan (BOB) ပေါ့။ Sunrise BOB စီးရင် မနက် ၅ နာရီခွဲလောက်ကနေ ၈နာရီခွဲလောက်အထိ ကြာပါတယ်။ ဒါကြောင့် အေးအေးဆေးဆေးသွားလို့ရအောင် ညနေလေယာဉ်ကို ယူထားရတာပါ။ ဧည့်သည်ရောက်ဖို့ (၁၅) ရက်လောက်အလိုမှာ Air Kanbawza က အကြောင်းကြားလာပါတယ်။ ညနေလေယာဉ် cancel ဖြစ်သွားပါတယ်တဲ့။ ဘာမှလည်း တာဝန်မယူပေးပါဘူး။ နောက်ပြီး ညောင်ဦး –  မန္တလေး ညနေလေယာဉ်က ရှားပါတယ်။ ကျန်တဲ့လေကြောင်းတွေကိုလည်း ဘယ်လိုမှ တင်လို့မရပါဘူး။ (၁၅) ရက်လောက်ပဲ လိုတော့တဲ့အတွက် ကျွန်မတို့ agent အချင်းချင်းရော၊ ဟိုဘက် agent နဲ့ ဧည့်သည်နဲ့ရော၊ ဟိုတယ် booking တွေရော အကုန်လုံးက fix ဖြစ်ပြီးသားပါ။ ဒီလိုအချိန်မျိုးမှာ program ပြောင်းဖို့ဆိုတာ တော်တော်လေး ခက်ပါတယ်။ မနက်လေယာဉ်စီးရအောင်ဆိုရင်လည်း BOB ကို လွတ်လို့ မဖြစ်ပါဘူး။ ညနေလေယာဉ်ကလည်း မရဘူး။ ပုဂံမှာ တစ်ရက်ထပ်နေရင်လည်း မန္တလေးဟိုတယ်ကို တစ်ရက် cancel လုပ်ရမယ်။ cancellation fees ပေးရမှာပါ။ ဧည့်သည်ဆီက ပိုက်ဆံထပ်တောင်းလို့လည်း မရပါဘူး။ Airline Department လည်း ဗြောင်းဆန်၊ ကျွန်မတို့ Sales တွေလည်း ဟိုဘက်ကို စာတွေပို့နဲ့ တော်တော်လေးကို ဂယက်ရိုက်ခဲ့ရတာပါ။ နောက်ဆုံးတော့ မနက် (၁၁) နာရီ လေယာဉ်ကို ယူလိုက်ပါတယ်။ BOB စီးပြီးတာနဲ့ ဧည့်သည်က တစ်ခါတည်း လေဆိပ်ကို တန်းလာ၊ ကျွန်မတို့ဘက်က တစ်ယောက်က လေဆိပ်မှာ ဧည့်သည်အတွက် check-in ကြိုဝင်ပေးထား၊ ဧည့်သည်ရောက်ရင် လေယာဉ်ပေါ်တန်းတက်..နည်းနည်းတော့ အန္တရာယ်များပြီး အလွဲမခံနိုင်တဲ့ အခြေအနေပါ။ မရတဲ့အဆုံးတော့ ရတာလေးကိုပဲ သတိကြီးကြီးလုပ်ဖို့ ဆုံးဖြတ်လိုက်ကြပါတယ်။

ဧည့်သည်လာလို့ အဲဒီနေ့ရောက်မယ့်ညမှာ Airline က အစ်မတွေက ရုံးမှာ အိပ်ကြပါတယ်။ နောက်နေ့အစောကြီးအတွက် တစ်ခုခုဆို ဖြေရှင်းလို့ ရအောင်ပါ။ ကျွန်မတို့အားလုံးလည်း ရင်ထိတ်နေပါတယ်။ ဒါပေမယ့် သတင်းတစ်ခုက ရောက်လာခဲ့ပါတယ်။ ရာသီဥတုမကောင်းလို့ BOB က cancel ဖြစ်သွားပါတယ်တဲ့။ ဘာပဲပြောပြော နောက်ဆုံးတော့ အဆင်ပြေသွားပါတယ်။

(ဆက်ပါဦးမည်။)