သံမဒကျီးအား အကျန်ပေးဂျင်း leftover

နိုင်ငံရေးအကဲဖျက် အကျွန်ုပ်ဦးကြောင်ကြီး သံမဒကျီးကို ဘယ်သူမှ မယူလို့ကျန်နေတဲ့ အကြံဂေါင်းတခု ပေးချင်တယ်။ ကြားဖြတ်ရွေးကောက်ပွဲရက် သိပ်နီးနေပြီ။ ရက်ပိုင်းပဲ လိုတော့တယ် သို့ပေသိ မြို့နယ်တိုင်းမှာ မဲစာရင်းကွာဟမှုတွေ ကျော်မကောင်း ကြားမကောင်း ဖြစ်နေတယ်။ အောက်ခြေ ကျေးရွာအတော်များများမှာ မဲဆန္ဒရှင်စာရင်းတောင် မကပ်နိုင်သေးဘူးဖြစ်နေတယ်၊ ကျေးရွာအဆင့်တွေက မြို့နယ်ညွှန်ကြားချက်ကိုစောင့်၊ မြို့နယ်က ခရိုင်၊ ခရိုင်ကတိုင်း၊ တိုင်းကပြည်ထောင်စုကော်မရှင်၊ ကော်မရှင်က ကော်မရှင်ငှက်ကထကိုစောင့်၊ ငှက်ကထက ငှက်ကထကတော်ကိုစောင့် (အိမ်လည်သွားတာ ပြန်လာသေးလို့) အဆင့်ဆင့်စောင့်ကြရင်း နောက်ဆုံး ကုတင်ကျိုးတာပဲ အဖတ်တင်မယ်။ မဲစာရင်း မမှန်မှတော့ ရွေးကောက်ပွဲလုပ်လည်း မထူးဘူး။ ညောင်မြစ်တူးရင်း ပုတ်သင်ဥပေါ်နေပြီ။ ကြားဖြတ်မဲစာရင်းကနေ ဘူးပေါ်သလိုပေါ်လာနေတဲ့ မဲလိမ်မှုသည် သမိုင်းမှတ်တမ်းများဖြစ်လို့ ၂၀၁ဝရွေးကောက်ပွဲ တရားဝင်မှုကို ခြိမ်းခြောက်လို့နေပါတယ်။
၂၀၁ဝရွေးကောက်ပွဲ ရလဒ်အဖြေကို ထိခိုက်မှာစိုးလို့ လိမ်ထားတဲ့ မဲစာရင်းတွေကို ပြင်လို့မရဘူး၊ လူသိ မခံရဲဘူးဆိုရင် အကောင်းဆုံးက ကြားဖြတ်ရွေးကောက်ပွဲ ရပ်ဆိုင်းလိုက်ပါ။ လွှတ်တော်ဖျက်သိမ်းလိုက်ပါ။ အထွေထွေ ရွေးကောက်ပွဲအသစ်တရပ် ကျင်းပပေးမယ်လို့ တိုင်းသိပြည်သိ ကြေငြာလိုက်ပါ။ သံမဒကျီးတို့ အဖြစ်က လုပ်စားတော့မိုးခေါင် ခိုးစားတော့ကြောင်ကုတ် ဆိုသလို ကျဉ်းထဲကျပ်ထဲ ရောက်နေပြီ။ ကိုယ်က လက်ဦးမှုယူ ကြေငြာပေးလိုက်ရင် ကြားဖြတ်အစိုးရ ဖွဲ့စရာ လိုချင်မှ လိုလိမ့်မယ်။ ဒီထက် ပိုကောင်းတာက ဒေါ်စုနဲ့ ညှိလို့ရရင် ညွှန့်ပေါင်းအစိုးရဖွဲ့ပြီး တိုင်းပြည်ကို ပူးတွဲ အုပ်ချုပ်သွားနိုင်တယ်။ ညွန့်ပေါင်းအစိုးရ အသစ်အနေနဲ့ အခြေခံဥပဒေကို ဒုတိယအကြိမ် ပင်လုံညီလာခံခေါ်ပြီး ပြန်လည်ရွေးဆွဲ၊ ရွေးကောက်ပွဲအသစ် ကျင်းပလိုက်။ ကိုယ့်ဖက်က လက်လွတ်မဖြစ်ရအောင် ပထမအစိုးရ သက်တမ်းမှာ အတိုက်အခံနဲ့ နားလည်မှု ယူပြီး အမတ်နေရာ ခွဲယူဂျပေါ့ဗျာ။ အသွင်ကူးပြောင်းရေးကာလ စစ်မှန်ရင် အဲဒီပထမငါးနှစ် အုပ်ချုပ်ရေး ပုံစံသစ်ကို အများပြည်သူ နားလည်ပေးဂျပါလိမ့်မယ်။
ပြည်သူလူထုသည် ယခုအချိန်ခါမှာ သံမဒဂျီးနဲ့ ငှက်ကထဂျီးကို ကြံ့ဖွတ်ပါတီနဲ့တွဲ မမြင်ဂျ နားလည်ခွင့်လွှတ် ပေးထားဂျတာဟာ မဟာအခွင့်အလမ်းဂျီး ဖြစ်ပါတယ်။ ဦးအောင်သောင်း ဦးဌေးဦး ဦးအောင်သိန်းလင်းတို့ လူမိုက်ဝင်လုပ်ပေးနေရတယ်။ သို့ပေသိ အချိန်ကြာလာရင် ပြည်သူလူထု သဘောထား ပြောင်းလာလိမ့်မယ်။ သံမဒဂျီးတို့အနေနဲ့လည်း ကိုယ့်ပါတီရဲ့ မတရားပြုမူမှုများကို မျက်ကွယ်ပြုဖို့ ခက်လာလိမ့်မယ်။ ဒါကြောင့်မို့ အချိန်ရှိခိုက် လုံ့လစိုက်ပါလို့ နှိုးဆော်လိုက်ရပါဒယ်။ မအောင်မြင်တော့လည်း ယူအက်စ်ကို ထွက်ပြေးလာဂျပြီး နိုင်ငံရေးခိုလှုံခွင့် တင်ဂျပေါ့ဗျာ..။ ကြိုဆိုနေပါ့မယ်။။
နိုင်ငံရေးခိုလှုံခွင့်ဥပဒေပညာရှင် ဦးကြောင်ကြီး 😎