မြန်မာ GSM ဖုန်းများ မလေးရှား၊ ထိုင်း နှင့် စင်ကာပူ နိုင်ငံများ တွင် အသုံးပြု နိုင်ရန် စီစဉ်နေ

အရှေ့တောင် အာရှ နိုင်ငံများ ဖြစ်သော မလေးရှား၊ ထိုင်း နှင့် စင်ကာပူ နိုင်ငံများ ထိ မြန်မာ GSM ဖုန်းများ ယူဆောင် အသုံးပြု နိုင်ရန် မြန်မာ့ ဆက်သွယ်ရေး လုပ်ငန်းမှ ယခုနှစ် အတွင်း စီစဉ်နေကြောင်း ဆက်သွယ်ရေး၊ စာတိုက် နှင့် ကြေးနန်း ဝန်ကြီး ဌာန၊ မြန်မာ့ ဆက်သွယ်ရေး လုပ်ငန်း မှ အမည် မဖော်လိုသူ အဆင့်မြင့် အရာရှိကြီး တစ်ဦးက ဟံသာဝတီ သို့ ပြောသည်။ မြန်မာနိုင်ငံ ပြင်ပမှာ သုံးနိုင်အောင် စမ်းသပ် နေတာ မှန်ပါတယ်။ ဒီနှစ်ထဲမှာ စပြီးတော့ အကောင် အထည် ဖော်မှာပါဟု ၎င်းက ဆိုသည်။ လက်ရှိ ပြည်တွင်း၌ အသုံးပြု နေသော GSM ဖုန်း များကို မလေးရှား၊ ထိုင်း နှင့် စင်ကာပူ နိုင်ငံ များသို့ ယူဆောင် သုံးစွဲ နိုင်ရန် စတင် စမ်းသပ် မှုများ ပြုလုပ် နေကြောင်း GSM ဖုန်း များသည် မြန်မာ ဆက်သွယ်ရေး လုပ်ငန်းမှ အရေ အတွက် အများဆုံး ချထား ပေးသောကြောင့် မြန်မာနိုင်ငံ ပြင်ပ တွင် အသုံးပြု နိုင်ရန် စီစဉ် နေကြောင်း မြန်မာ ဆက်သွယ်ရေး လုပ်ငန်း ထံက သိရသည်။

ရန်ကုန်မြို့တွင် ဂျီအက်စ်အမ် ရေဒီယို စခန်းသစ် ၃၃ ခု တည် ဆောက်ပြီး လိုင်း ၈၀ဝ၀ဝ တိုးချဲ့မည် ဖြစ်ကြောင်း ၊ အဆိုပါ လိုင်းသစ်များ တိုးချဲခြင်း အပြင် GSM ဖုန်း လိုင်းဆွဲ အားများ ကောင်းမွန် စေရေး အတွက် MCS ဆက်သွယ်ရေး ပင်မ စခန်း ခံနိုင် ဝန်မြှင့်ခြင်း၊ BTS စခန်း ကိုးခု တပ်ဆင်ခြင်း နှင့် CU (Carrier Unit) ၉၂ ခု တိုးမြှင် ခြင်းများ ဆောင်ရွက်လျက် ရှိကြောင်း နိုင်ငံပိုင် မီဒီယာ များ၏ ဖော်ပြချက် အရ သိရသည်။ မြန်မာ နိုင်ငံတွင် ၁၉၈၈ ခုနှစ် မတိုင်မီ တယ်လီဖုန်း အိတ်ချိန်းပေါင်း ၂၄၅ ခု ရှိရာ ယခုတွင် အိတ်ချိန်းပေါင်း ၈၈ရ ခု ရှိပြီး အော်တိုတယ်လီဖုန်း၊ လက်သံ တယ်လီဖုန်း နှင့် မိုဘိုင်းဖုန်း အရေအတွက် ၇၃၄၂၁၉ လိုင်း ရှိနေပြီ ဖြစ်ကြောင်း သိရှိရသည်။