ဆိုရင်

ငါဆိုတာ
ဘဝကို ခပ်ပါးပါးဖြတ်သန်း
လေကိုဒါန်းစီးချင်တဲ့သူ

နင်ဆိုတာ
ကမ္ဘာကိုလေ့လာ
စကြာဝဠာအစကိုတောင်မှ သိချင်တဲ့သူ

အင်တာနေရှင်နယ် ဘာညာသာရကာအစည်းအရုံး
ငါမကြားဘူးတဲ့စကားလုံးတွေနဲ့ကြိမ်းဝါး
ကြက်သည်းမွေးညင်းထအောင် ခြောက်ခြားမိပါရဲ့

ကမ္ဘာ့စာရင်းမှာမှ
မှတ်တမ်းတင်ချင်တဲ့ နင့်ဆန္ဒ
ငါလေးစားလှပါတယ်

ဒါပေမယ့် သူငယ်ချင်း
စာအုပ်တွေ ထောင်ကျော်ဖတ်
အင်တာနက်ကို ဂူဂယ်ခေါက်
ဟော့ကင်းကို အသော့နင်း
ဘစ်ဘမ်းကို သေချာမှန်း
ဘလက်ဟိုးကို တစ်ချက်တိုးမှ
စကြာဝဠာရဲ့အစကိုသိရမယ်ဆိုရင်…
နေကမ္ဘာရဲ့သက်တမ်းကို မှတ်တမ်းပြုရမယ်ဆိုရင်…
နင်ပြောတဲ့ ဟိုအစည်းအရုံးမှာ လူလုံးပြခွင့်ရမယ်ဆိုရင်…
နေပါစေတော့ကွယ်
စကြာဝဠာရဲ့အဆုံးမှာ
အရှုံးတွေနဲ့ လူမဖြစ်ရဖို့ကို
ငါပိုပြီး စိတ်ဝင်စားပါတယ်…။

ဧကရီ
(၄.၄.၂၀၁၀)