စနိုးဒန် အပိုင်း (၂)

၂၀၁၃ ခုနှစ်၊ ဇွန်လ ၁၄ ရက်နေ့တွင် အမေရိကန် တရားရေးဌာနမှ Snowden အား သူလျိုမှုနှင့် နိုင်ငံတော်ပစ္စည်းများအား ခိုးယူမှုတို့ဖြင့် တရားစွဲဆိုထားကြောင်း ထုတ်ပြန်ကြေငြာခဲ့ပါသည်။ အမေရိကန် အစိုးရမှ ဟောင်ကောင် အာဏာပိုင်များကို Snowden အား အမေရိကန်သို့ ပြန်လည်လွှဲပြောင်းပေးရန် တောင်းဆိုခဲ့သော်လည်း Snowden သည် ၂၀၁၃ ခုနှစ် ဇွန်လ ၂၃ ရက်နေ့တွင် မော်စကိုသို့ ထွက်ပြေးတိမ်းရှောင် ခဲ့ပါသည်။
ဇွန်လ ၂၃ ရက်နေ့တွင် အမေရိကန်အစိုးရမှ Snowden ကိုင်ဆောင်ထားသော passport အားပြန်လည် ရုပ်သိမ်းကြောင်းထုတ်ပြန်ကြေညာခဲ့ပါသည်။ ၂၀၁၃ ခုနှစ် ဇူလိုင်လ ၁ ရက်နေ့တွင် နိုင်ငံပေါင်း ၂ဝ သို့ နိုင်ငံရေးခို လှုံခွင့်ပေးရန် Snowden မှလျောက်ထားခဲ့ပါသည်။ ထိုနေ့၌ပင် သမ္မတပူတင်မှ Snowden အနေဖြင့် မိမိတို့၏မိတ် ဆွေအမေရိကန်နိုင်ငံအား ထိခိုက်စေမည့်လုပ်ရပ်များကိုရပ်တန့်ပါက ၎င်းအားနိုင်ငံရေးခိုလှုံခွင့်ပေးမည်ဖြစ်ကြောင်း ပြောကြားခဲ့ပါသည်။
ဇူလိုင်လ ၁၅ ရက်နေ့တွင် ရုရှားသမ္မတပူတင်မှ Snowden ၏ရောက်ရှိလာမှုသည် ရုတ်တရက်ဖြစ်ပြီး ရုရှားနိုင်ငံအတွက် မလိုချင်သောခရစ္စမတ် လက်ဆောင်ပင်ဖြစ်ကြောင်း ပြောကြားခဲ့ပါသည်။ ၂၀၁၃ ခုနှစ် ဇူလိုင်လ ၁၆ ရက်နေ့တွင် Snowden အနေဖြင့် ရုရှားနိုင်ငံ၌ ခေတ္တနိုင်ငံရေးခိုလှုံခွင့်ရရှိရန်လျောက်ထားခဲ့ကြောင်း ရုရှားနိုင်ငံမှအတည်ပြုပြောကြားခဲ့ပါသည်။
ရုရှားနိုင်ငံလေဆိပ်တွင် တစ်လကျော်ကြာနေထိုင်ခဲ့ရပြီးနောက် ၂၀၁၃ ခုနှစ် ဩဂုတ်လ ၁ ရက်နေ့တွင် ရုရှားနိုင်ငံမှ တစ်နှစ်သက်တမ်းရှိခေတ္တနိုင်ငံရေးခိုလှုံခွင့်ကို Snowden အားပေးအပ်ခဲ့ပါသည်။ Snowdenသည် လေဆိပ်မှထွက်ခွာသွားပြီဖြစ်ပြီး လုံခြုံသောနေရာတစ်ခုတွင်နေထိုင်လျက်ရှိပါသည်။
အဆိုပါကိစ္စနှင့်ပတ်သက်၍ ယခုနှစ် စက်တင်ဘာလတွင် ရုရှားနိုင်ငံ စိန့်ပီတာစဘက်မြို့၌ ကျင်းပမည့် G20 အစည်းအဝေးပွဲတွင် ရုရှားနှင့်အမေရိကန်ခေါင်းဆောင်နှစ်ဦးသီးခြားတွေ့ဆုံမည့်အစီအစဉ်အား ပြန်လည်သုံးသပ်ရမည့်အခြေအနေဖြစ်ကြောင်း အိမ်ဖြူတော်ပြောရေးဆိုခွင့်ရှိသူ Jay Carney မှထုတ်ပြန်ကြေညာ ခဲ့ပါသည်။ အမေရိကန်ဥပဒေပြုအမတ်အချို့ကလည်း ရုရှားနိုင်ငံအပေါ်ပြင်းပြင်းထန်ထန်တုံ့ပြန်သင့်ကြောင်း၊ ရုရှားနိုင်ငံ Sochi မြို့၌ ၂၀၁၄ ခုနှစ်တွင်ကျင်းပမည့် ဆောင်းရာသီအိုလံပစ်ပွဲတော်ကိုလည်း ဆန္ဒပြသင့်ကြောင်း ပြောကြားခဲ့ကြပါသည်။
၂၀၁၃ ခုနှစ် ဩဂုတ်လ ရ ရက်နေ့တွင် အိမ်ဖြူတော်မှ အမေရိကန်နှင့်ရုရှားခေါင်းဆောင်နှစ်ဦးတို့ သီးခြားတွေ့ဆုံမည့်အစီအစဉ်ကို ဖျက်သိမ်းလိုက်ကြောင်း တရားဝင်ထုတ်ပြန်ခဲ့ပါသည်။ ဩဂုတ်လ ၈ ရက်နေ့တွင်Snowden အသုံးပြုခဲ့ဘူးသော Texas အခြေစိုက် Lavavit အီးမေးလ်ဝန်ဆောင်မှုလုပ်ငန်းသည် ပိတ်သိမ်း ခဲ့ရပါသည်။

၎င်း၏ လုပ်ရပ်နှင့်ပတ်သက်၍ လူအများမှ သဘောထားအမြင် အမျိုးမျိုးရှိကြပါသည်။ ကွန်ဂရက် လွှတ်တော်အမတ်John Boehner ၊ Dianne Feinstein ၊ Bill Nelson တို့မှ Snowden အား သစ္စာဖောက်ဟု ခေါ်ဝေါ်သုံးစွဲခဲ့ကြပါသည်။ သို့သော် ၎င်းအား ထောက်ခံသူများလည်းရှိပြီး လွှတ်တော်အမတ် မစ္စတာ Paul က Snowden သည် လူတစ်ဦးချင်းစီ၏ လွတ်လပ်လုံခြုံမှု (Privacy) နှင့်ပတ်သက်၍ အမှန်တရားကို ဖော်ထုတ်ပြောကြားသူဖြစ်ကြောင်း ချီးမွမ်းခဲ့ပြီး လွှတ်တော်အမတ် John Lewis ကလည်း Snowden အား အိနိ္ဒယနိုင်ငံ၏ ခေါင်းဆောင် မစ္စတာ ဂနီ္ဓ နှင့် နှိုင်းယှဉ်ချီးမွမ်းခဲ့ပါသည်။
၂၀၀၉ ခုနှစ်တွင် လန်ဒန်၌ပြုလုပ်ခဲ့သော G၂ဝ အစည်းအဝေး၌လည်း အမေရိကန်မှ ဆွေးနွေးဘက် နိုင်ငံများအပေါ် သတင်းခိုးယူထောက်လှမ်းမှုများ ရှိခဲ့သည့်အတွက် အလွန်ပင်စိတ်ဆိုးရကြောင်း ရုရှား၊ တူရကီနှင့် တောင်အာဖရိကနိုင်ငံတို့မှထုတ်ဖော်ပြောကြားခဲ့ပါသည်။လက်ရှိကာလတွင် Snowden သည် လုပ်ငန်းအတွေ့ အကြုံရှိပြီး ကျွမ်းကျင်သူဖြစ်သောကြောင့် ရုရှားကုမ္ပဏီများမှ အလုပ်ကမ်းလှမ်းလျက်ရှိကြောင်း သိရှိရပါသည်။ Snowden  မှ မိမိအား ကာကွယ်ပေးခဲ့သည့်အတွက် ရုရှားနိုင်ငံအား ကျေးဇူးတင်ကြောင်းလည်း ပြောကြားခဲ့ပါသည်။